أكلة هدية للأستاذ أحمد العطار وأي حد يحب يتغدا

[b]شوربة سي فود

أكلة هدية للأستاذ أحمد العطار وأي حد يحب يتغدا 45rn8

سلام عليكم يا جماعه

نحدثكم من مطبخنا الجديد

وانا بصراحه فكرت كتير كتير هانعمل ايه

وهى شوربة السي فود او فواكه البحر

يلا قدامي على المطبخ

المقادير :

بصله كبيره مقطعه جوانح -- 3 فصوص ثوم كبير -- فلفل رومي الوان مقطع مكعبات -- 2 طماطم متوسطه مقطعه مكعبات برضه .

نص كيلوا جمبري مقشر ــ نص كيلوا كاليماري (حبار) مقشر ــ كيلوا كابوريا ــ كيلو بكلويز

نص كوب لبن ــ 2 ملعقه دقيق ــ ملح وبهارات سمك

====================

تجهيز المكونات

طبعا البصل والتوم والفلفل والطماطم قطعناهم فوق اهو

السي فود بقى

الجمبري ممكن تشتريه اصلا متقشر أو تجبيه فريش وتقشريه وتغسليه كويس ولو كان كبير شويه افتحي ضهره

الكلماري برضه نفس الموضوع فى منه مقشر جاهز فلبينى وصينى وفيتنامي مالي السوق ب 13 جنيه كيلوا صافي

الكابوريا نقشرها برضه نشيل الادين كلها ونفتحها ونقسم قلبها اثنين ونغسلها كويس وده الى هانستعمله

وممكن ناخد كمان شوية ادين كده تكون كبيره وسليمه وشكلها حلو بتعمل طعم للشوربه وشكل حلو للطبق

البكلويز بقى ده نجيبه ننقعه حوالي ساعتين لحد لما يفتح وتمسكيه تغسليه واحده واحده تحت الميه عشان تتأكدي انه مافيش فيه رمل من جوه والى ما تعرفيش تفتحيها ارميها عشان ممكن تكون وحشه او مليانه رمل

الطريقه :

شوفوا هى اهم حاجه فى الطريقه بقى بعد كده الترتيب

الاول هانضيف البصل والخضار بالترتيب ده وبين كل واحد والتاني دقيقتين تقريبا

البصل ـــ الفلفل ــــ الثوم ــــ الطماطم

باحب اسيب شوية فلفل وطماطم ابقى اضيفهم فى الاخر بيدوا شكل وطعم حلو اوي

بعد كده بقى نبدأ نضيف المكونات الاساسيه للشوربه الى هى السي فود :

برضه بالترتيب ده وبين كل واحد والتاني 3 دقائق وكل ما نضيف مكون نقلبه مع الى قبله بس مش بالمعلقه عشان ما تتهريش الحاجه نسمك الحله كده ونطقها

الكلماري ـــ الكابوريا ـــ البكلويز ـــ الجمبري

ونضيف الملح والتوابل

بعد كده نحط ميه نغطي بها المكونات كلها ونسيبها تغلي

وعلى ماتغلي نجيب نص كوباية اللبن الى فوق دي وندوب فيها معلقتين دقيق وممكن نخليها معلقه دقيق ومعلقه نشا

وبعدين لما يغلي الخليط نصب اللبن مع الدقيق عليها من خلال مصفاه صغيره عشان ما ناخدش كلاكيع دقيق ونقلب كويس واحنا بنصبها عشان ما تكلعكعش برضه .

وبعدين نضيف شوية الفلفل والطمطام الى كنا سايبنهم فوق ونقلب كويس ونظبط الملح ونسيبها تغلي 3 دقايق كده لحد ما الشوربه تتخن شوي

ونطفي عليها ونغرفها فى سلطنيات ونزين وشها بشوية كسبره او بقدونس وزي ما تحبي

ونقدم معاها نص لمونه

وممكن نقدم معاها أرز ابيض وتبقى وجبه كامله

وكلوا وادعولي بقى

ملحوظات :

ـــ ممكن بدل الدقيق والنشا نستخدم اكياس شوربه جاهزه فى مخصوص للسي فود لكن المنتشر اكتر اكياس شوربة الدجاج والمشروم وكله ماشي يعنى مافيش مشكله

ـــ ممكن نضيف مكعبات سمك بس دي بتكون اخر حاجه خالص قبل ما نحط اللبن بالدقيق على طول عشان ما بياخدش سوا خالص

ـــ ممكن نعمل الشوربه بمكونات عددها اهل من كده طبعا الى متوفر فى السوق ساعتها لانها اغلبها لها مواسم معينه

لكن المجمد بيحل المشاكل كلها دلوقتي

ـــ يفضل انها تتاكل على طول بمجرد الانتهاء من طبخها بتكون احلى بكتير

ـــ ما تسويهاش كتير كل السي فود لو استوى كتير بيبقى مش حلو خالص

ـــ الكميه الى انا عاملاها دي كتير على فكره تكفي مثلا 6 اشخاص

وبس كده وابقوا قوليلى رايكم

وعلى فكره الصوره الى فوق دي انا جايبها من النت

تحياتي لكم
[/ce

==============

شكراً ليك ياباشا
بس انا مبكلش سمك
بس شكلها تحفة

شكلها كده طعمها حلو
ايه احنا لينا فيها ولا ايه؟

خلاص احمد مبيكلشى سمك كلو يمد إيده إنها غنيمة لنا

الأكل في المطعم ده مضمون ولا أيه :hungry: :hungry: :hungry: :hungry:

يا عطار أنا طبعا عارف انك ما بتكلش سمك
وأكيد أنا بهزر معاك
وكذا مرة لما يكون في سمك انت تسيبنا وما تكلش معانا

seruios

أكيد طيعا الأكلة الحلوة دي كل اللي عايز يتفضل
كل ده علشانكم لسه هتستأذنوا مني علشان تتفضلوا تاكلوا

اتفضل يا شاهين البيت بيتك

بس الحق السي فود وهو ساخن

totti

أحب أطمنك إن المطعم ده مضمون 100%

» نكت إهدأ للأستاذ القدير أحمد العطار
» ©™UEFA CHAMPIONS LEAGUE CORNER ™© البارسا X المان .. من سيكون حاكم هذا الزمان
» كوميك شو - أحمد فؤاد نجم
» كوميك شو - أحمد شوبير
» "بدخول أحمد عز بملياراتة " هيكون مين مدرب الاهلى