لمن لديه مشكلة بجهازه

أتمنى إن أي حد عنده مشكلة في جهازه يتفضل يطرح مشكلته هنا أو يسأل سؤاله

وانا إن شاء الله أقوله حلها وأجاوب على أسئلته

وحتى لو الإجابة مش عندي هدور لحد ما أجيبهاله

كل الشكر اسلام على مبادرتك الطيبة ومساعدتك للجميع

واوعدك انك هتلاقينى هنا كتير

لانه مفيش عمار بينى وبين الكمبيوتر ومشاكلى معاه كتير

المهم

نخلينا فى أول مشكلة

واعتقد انها تكون بسيطة ان شاء الله

كنت منزلة برنامج ماسنجر اللى بدون تسطيب

وبعد كام يوم بطل يفتح معايا معرفش السبب ايه

مسحته

وجيت عشان احمل البرنامج جيت عشان اسطبه ظهرت ليا الرسالة دى

عملنا الاوكيه

وظهرت ليا صحفة تانية
بس معرفتش اعمل ايه

وبس

إن شاء الله بسيطة يا ضي القمر

انتي بس وريلي الكمبيوتر اللي مفيش بينك وبينه عمار دا وأنا أربيهولك من أول وجديد

وأخليه يمشي بالإشارة من غير ما تلمسيه

بالنسبه لموضوع ال Windows Installer حملي الملف ده وسطبيه عندك قبل المسنجر

وإن شاء الله المسنجر يتسطب وابقي عرفيني اللي حصل

ودول لينكين للبرنامج إن لم يعمل أحدهما يعمل الثاني بإذن الله

اللينك الأول
http://download206.mediafire.com/5yjhdxksudpg/0yimnxmmomy/WindowsInstaller-KB893803-v2-x86.rar

اللينك الثاني
http://www.mediafire.com/?sharekey=c4b3e7679a75f87fd9d5c56d04dfa8b0e04e75f6e8ebb871

خالص شكرى لك إسلام

دخلت على اللينك ونزلت البرنامج وسطبته

والحمد لله

تمام تمام

بجد كل الشكر اسلام

بس مش عارفه ليه الهوت اللى عندى لما فتحت الايميل

كل اللى عندى توبيكاتهم ظاهرة عندى بالصينى تقريبا

ياستاذ إسلام الجهاز بتاعى أنا شاريه من شركه اسمها كمبيو...... وكل يوم يطلعللى فيه مشكله المشكله الجديده النهارده أنو الجهاز أول لما بفتحه بيجيب شاشه سوده اللى فى الأول ديه وبيعمل صفاره متقطعه وبيكتبللى cpu fan
المهم فكيت المروحه ونظفتها وكلو تمام اشتغل شويه ورجع يعمل الحوار ده تانى وعشان أعرف اشغل الجهاز لازم أعمله ريستارت كذا مره وشكرا

الاخت ضى القمر على فكره موضوع الكتابات الصينى ده فى الأعدادات الخاصه باللغه فى الجهاز عندك أو فى الماسنجر نفسه وشكرا

بالنسبة للأخ shaheen_1eg متهيألي كده أنا عارف الشركة اللي انت شاري منها الجهاز اللي اسمها كمبيو .....
وعلى فكرة حاجتهم كلها مش قد كده
وضماناتهم وحشة
أنصحك متتعاملش معاهم تاني
أما بالنسبة لموضوع ال cpu fan Error دي ممكن تتقفل من إعدادات البايوز
بس ده يتوقف على نوع الماذر بورد
ومن تخميني كده إن الماذر بورد بتاعتك Asus
يبقى تدور على حاجه إسمها cpu Fan Speed وتعملها Disabled ومش شرط تلاقيها بنفس الإسم ده
المهم الأوبشن ده خليه Disabled وإن شاء الله الرسالة دي مش هتظهرلك تاني
ويفضل التأكد من درجة حرارة البروسيسور الأول قبل ما تعمل كده لأن ممكن تكون ال Fan مش شغالة بكفاءة
وفي الحالة دي هتحتاج لتغيير وطبعا هتروح تشتري واحده من الشركة إياها
بس متخافش مش هقولهم حاجه

أما بالنسبالك يا ضي القمر

ممكن تكون امشكلة في إعدادات اللغة في جهازك بالفعل زي ما قال الأخ shaheen_1eg

ومع ذلك هحاول أتأكدلك من السبب وأجيبلك الحل في أسرع وقت إن شاء الله

ياباشا عاجزين عن الشكر بصراحه الشرح ولا كأنك قاعد على جهازى عارف فى جهازى حاجات أنا معرفهاش

السلام عليكم

انا جهازى برضو رخم اوووى مش راضى ينزل الماسنجر وروحت نزلت الماسنجر اللى من غير تسطيب ده
بس نفسى ينزل الماسنجر البلس ولما بنزله بيكتبلى تحديث ويفضل يحدث ومش بيرضى يشتغل خالص
دى اول مشكلة

تانى مشكلة بقى انى نزلت انتى فيرس كاسبر ومش ظاهر ولما اعمل كيك يمين القيه مش راضى يبحث عن الفيروسات
يعنى مش راضى يفتح اصلا :sad:

[center]

واهى صورة عشان تشوف ازاى مش راضى يفتح اصلا

[/center]

السلام عليكم ورحمة الله وبركاته
أولا أنا بتأسف عن غيابي عن المنتدى الفترة اللي فاتت لظروف خارجة عن إرادتي
أما بالنسبة للمشكلة الأولى عندك يا بكاء القمر
دي بسبب إن الإصدار اللي عندك قديم وعشان يفتح معاكي لازم يعمل أبديت
والأبديت بطيييء وممل وفي الغالب مش هيفتح برضو بعد الأبديت
يبقى الحل إنك تنزلي نسخة حديثة من الWindows Live Messenger وتسطبيها
ولو معرفتيش تنزليها عرفيني وانا أرفعهالك وأبعتلك اللينك
وبخصوص المشكلة التانية بتاعة الكاسبر
يا إما الكراك أو الكيجن بتاعه بايظ وبالتالي توقف عن العمل
أوفي فيرس على الجهاز بوظ الكاسبر وأوقف عمله
أو النسخة اللي سطبتيها بايظة من الأول
يعني ممكن تكوني غيرتي ويندوز بسبب وجود فيرس على الجهاز ورجعتي سطبتي الكاسبر من على الجهاز وده غلط
لأن المفروض لما يكون في فيرس على الجهاز لازم أسطب كل البرامج بعد تغيير الويندوز من مصدرخارجي إسطوانة أو فلاشة مثلا
ومفتحش أي بارتيشن إلا بعد ما أعمل سكان على الجهاز كله الأول
المهم دلوقتي شيلي الكاسبر وحاولي تسطبيه من الأول ولو مشتغل يبقى الأفضل والأضمن تغيري ويندوز وتعملي كل اللي قلته بالظبط
ولو في أي حاجه في كلامي مش واضحة عرفيني وانا أقولهالك تاني
وأنا في الخدمة دائما

رنا يخليك لينا يا عم إسلام مش عارفين من غير خبراتك دي كنا هنروح فين
مش هنروح أول الشارع

ميرررررررررررسى

وانا هعمل اللى قولتلى عليه ولو فى مشكلة هرجع اقولك اكيد

عند تثيب برنامج ياهوو قطع النور وجيت اثتبة تانى اجاتلى علامة تحذير انة فية ماف ناقص وادور على البرنامج فى كنترول بنل ولم اجدة ومش عايز يثتب بردة تانى وطبعا دة خلانى انزل ويندوز جديد طب فية حل اسهل للمشكلة دة

مش الموضوع اتحل وسطبت الياهو
خلاص بقى
وبالنسبة لموضوع الحل الأسهل ده
أنا معرفش قطع النور أتلف إيه بالظبط في ملفات الويندوز عندك أو في ملف الياهو
لأن تأثير قطع النور ده مش محدد ولا محسوب دا بيبقى تأثير عشوائي
وبالتالي مقدرش أفتيلك الخلل فين بالظبط عشان تعالجه
لأن قطع الكهرباء المفاجئ عن الجهاز ممكن يسبب تلف في الهارد وير
وممكن يسبب تلف في ملفات السيستم في الويندوز
وممكن يسبب تلف في البرنامج اللي كنت شغال عليه لما الكهربا قطعت
وممكن ميسببش أي تلف نهائي ويمر الموضوع بإن الويندوز يعمل سكان أول ما يفتح تاني
وممكن لو الويندوز معملش سكان تعمله انت يدوي وبعد أول إعادة تشغيل يعمل سكان ويصحح الخطأ اللي حصل في ملفات السيستم
ودا عن طريق إنك تعمل كليك يمين على البارتشن سي وتختار بروبيرتز ومن النافذة اللي تفتحلك تختار توولز وهتلاقيها فوق في النافذة
هتلاقي الصفحة مقسمة ل3 أجزاء
أول جزء فوق إسمه Error checking وهو ده المطلوب هتضغط على check Now
هيظهرلك مربع جديد هتعلم على الاختيار الأول اللي هو Automatically fix file system errors وتضغط على start
هيظهرلك رسالة مفادها إن مينفعش تعمل سكان دلوقتي لأن عمل سكان يتطلب الوصول لملفات معينة مينفعش الويندوز يوصلها دلوقتي وهيسألك تحب جدولة العملية دي عشان تتعمل مع أول إعادة تشغيل ؟
طبعا انت هتضغط No
هههههههههه
أنا بهزر
قصدي طبعا هتضغط yes
وبعد أول ريستارت الكمبيوتر هيعمل سكان على الويندوز على البارتشن سي يعني لتصحيح أخطاء ملفات النظام
وبعد كده تحاول تعمل اللي كنت بتعمله قبل النور ما يقطع
ولو منفعش برضو تحاول تجيب ملف للبرنامج اللي كنت بتسطبه غير اللي النور قطع أثناء تسطيبه
ولو منفعش يبقى تغير ويندوز وأمرك لله
هههههههههههههههههههه
أتمنى إن كلامي يكون فيه فايدة ليك
وآسف لو طولت وأسهبت في الكلام زيادة عن اللزوم

عندي جهاز في الشغل بيعطي صفارة متقطعة عند بداية التشغيل وفكيت الرام والكروت كلعا والشاشة لا تعمل وتم تغيير كارت الشاشة وتغير الرام

بنتيوم إيه
والبروسيسور كام

الجهاز بنتيوم فور وتقريبا البروسيسور 2.8 او 3 بس لية السؤال ده وشكراااااااااااااا

علشان اعرف الجهاز حديث ولا لآ
بس عموماً اخر سؤال كارت الشاشة من الأول خارجى ولا لأ
ونوع المازر بورد إيه

جهازي بيعمل ريسترت كتير ممكن تكون المشكلة من ايه ؟؟؟؟

ممكن عيب ويندوز
فى حالة تغيير الويندوز فهو حالة من أثنين إما عيب فى الرامات أو تبريد البروسيسور
تعرف الفرق إزاى
لو الرامة ده بيحصل فى حالة وانت شغال وفاتح حاجات كتيير أو بتشتغل على برنامج تقيل
التبريد بتاع البروسيسور تعرفة فى حالة حدوث ريستارت بدون اى حاجة مجرد ان الجهاز مفتوح لفتره
ويا رب تكون عرفت سبب المشكلة

ممكن سؤال؟
اذا كنت فاتحه النت وبعمل سيرش علي موقع أو كتبت كلمه وبعد كه جيت تاني يوم وعايزه امسح اسم الموقع ده أصلي بحاول امسح مش راضي. ماذا افعل؟
يارب يكون سؤالي واضح.
ولك جزيل الشكر.

ادخلى على قائمة
tools
واختارى مسح الكوكيز والhistory والfiles

شكرا ليك يا مستر زادك الله علما

» لحل مشكلة الملفات المفقودة من الويندوز
» حل مشكلة إختفاء الفولدر أوبشن بدون برامج